Слепцова Анастасия Иннокентьевна

Слепцова Анастасия Иннокентьевна ахтыыта:

 Мин өссө 9-10 кылааска үөрэнэ сылдьан, тетям Слепцова Аксинья Николаевна библиотека үлэтигэр үөрэппитэ. Ол курдук, кинигэ фондатын салааларынан туруоруу, ааҕааччы формулярын толорууну оскуола сааспыттан баһылаабытым. Итини сэргэ инвентарнай кинигэни толоруу курдук библиотекарь үлэтин барытын. Кини такайбыт үлэтин ылынаммын, сөбүлээммин, мин эдьиийим курдук библиотекарь буолар эбиппин диэн бигэ санаа ылыммытым. Уонна онтубун ситиһэр сыалтан, оскуоланы бүтэрэн баран, Дьокуускайдааҕы культпросветучилищеҕа библиотека үөрэҕэр туттарсан киирбитим. Оччолорго ийэм ыалдьар буолан, иһиттэн кыайан үөрэммэтэҕим, кэтэхтэн үөрэммитим. Үөрэнэ киирбитим кэннэ хайҕанар этим, үчүгэй практикалааххын диэн. Ити практикаҕар теорияҕын үчүгэйдик үөрэттэххинэ, үчүгэй специалист буолуоҥ диэн сылыктыыллара. Эппиттэрин курдук, үөрэхпин «туйгун» сыананан бүтэрбитим.

1968 сыллаахха Дружина орто оскуолатын бүтэрбитим. Үөрэххэ кэтэхтэн киирэн баран, балаҕан ыйын 1 күнүттэн Захарова Акулина Тимофеевна библиотекарь көмөлөһөөччүтүнэн үлэҕэ ылбыта. 1971 сыллаахха үөрэхпин бүтэрээппин кытта, олохтоох кадрдары өйүүр программа чэрчитинэн, сэбиэдиссэйинэн анаабыттара. Ол кэмҥэ оҕо библиотекатыгар Матрена Семеновна Слепцова үлэлии сылдьар этэ, Слепцова Альбина Иннокентьевна үлэлии кэлбитэ.

Оччотооҕу саҕана партия укааһынан үлэ-хамнас ыытыллара. Оройуон салайааччылара Яковлев Николай Никитич, Иванов Клиент Егорович, Степанова Анастасия Никифоровна сүрдээх ирдэбиллээх салайааччылар этилэр. Уопсай да үлэни, библиотека да үлэтин хонтуруолга тутан олорооччулар. Итини сэргэ, «Знание» общество лектордарыгар элбэх матырыйаал булан биэрэрбит.

Сэбиэскэй кэмҥэ үлэ-хамнас, олох-дьаһах киэҥник сырдатыллара. Араас ис хоһоонноох кинигэ, сурунаал быыстапкалара, суруйааччылар үбүлүөйдэринэн обзордар, лекторийдар быыстала суох бараллара. Мин маассабай үлэни сүрүннүүрүм. Слепцова Клавдия Иннокентьевна сүрдээх күүстээх лектор этэ.

Нэһилиэнньэҕэ билиҥҥи курдук телевизор, телефон суоҕа. Онон, сүрүн информацияны олохтоохтор библиотекаттан эрэ ылаллара. Ааҕааччы конференцията, тылынан сурунааллар (устные журналы), аахпыт кинигэни ырытыы курдук дьаһаллар куруутун ыытыллаллара. Онон көхтөөх ааҕааччыларбыт оччолорго үлэлээбит дьон өйбүтүгэр-сүрэхпитигэр куруутун бааллар.

1978 сыллаахха дьиэ-кэргэним балаһыанньатынан куоракка барбытым. Үлэбин Уваровская Ирина Васильевнаҕа туттарбытым. Куоракка тиийэн республиканскай библиотека ааҕар саалатыгар 1983 сыллаахха диэри үлэлээбитим. Кэлэн 1998 сыллаахха диэри Оттоох-Атах библиотекалаах кулуубугар үлэлээбитим.