Слепцова Альбина Иннокентьевна (Майзик)

Мин, Альбина Иннокентьевна Слепцова (Майзик) 1953 сыллаахха ыам ыйын 26 күнүгэр Дружина бөһүөлэгэр Слепцовтар дьиэ кэргэттэригэр бастакы оҕонон күн сирин көрбүтүм. Оҕо, орто сааһым Дружинаҕа ааспыта. Үөрэммитим, үлэлээбитим, общественнай үлэҕэ куруук кыттарым.

1983 сыллаахха Аллайыаха сиригэр ыал буолан, көһөн кэлбитим. Аан бастаан совхозка пушной мастерскойга рабочайынан үлэлээбитим. 1984 сыллаахха библиотекаҕа завхоһунан киирбитим. Сыл буолаат, старшай библиотекарынан ылбыттара. Ити кэмтэн ыла сэбиэдиссэйинэн, библиогравынан күн бүгүнүгэр диэри үлэлии-хамсыы сылдьабын.

Библиотека үлэтин-хамнаһын кытта аан бастаан билсиибин куруук өйдүүбүн. Ол курдук, бастакы бэсиэдэлэри, кинигэни билиһиннэриилэри, библиотека документациятын оҥорууну наставникпыттан Матрена Семеновнаттан ылбытым. Кини миэхэ элбэҕи сүбэлээбит, бастакы олук уурбут киһибинэн буолар. Оччолорго оскуоланы, детсады кытта биир былааннаахтык тугу сатыырбытынан оҥорорбут. Ол курдук, утренниктары, араас конкурстары, суруйааччылар үбүлүөйдэрин, онтон да атын мероприятиелары ыытарбыт.

Үлэлии сырыттахпына библиотека үөрэҕэр киир диэн оччотооҕу сэбиэдиссэй Матрена Семеновна Слепцова сүбэлээбитэ. Ол курдук, төрөөбүт дойдубар Абыйга, үлэ диэн үтүөтүн 1972 сыллаахтан 1983 сылга диэри билбитим. 1974 сыллаахха Дьокуускайдааҕы культурнай-сырдатар училище библиотека салаатын кэтэхтэн үөрэнэн бүтэрбитим. Салҕыы үөрэхпин үрдэттэн, Илин Сибирдээҕи культура институтун «Библиотекарь-библиограф” идэтигэр 1982-1987 сылларга үөрэнэн бүтэрбитим.

Библиотекарь идэтэ сүрдээх киэҥ, элбэх үлэни, кыһамньыны эрэйэр. Бу идэҕэ сыстарбар улахан көмөнү, элбэх сүбэни-аманы биэрбит киһибинэн ийэм, Слепцова Анна Алексеевна эмиэ буолар. Бириэмэ буллар эрэ, эбэбитигэр анаан, саха суруйааччыларын кинигэлэрин доргуччу ааҕара. Онно олус интэриэһиргээн истэрим: бу тыла үчүгэйэ, дикцията, оруоллары сыанкаҕа оонньоон эрэр киһи курдук хас биирдии геройугар тохтуура. Учууталым Наталья Яковлевна Слепцова үгүс сүбэтин-аматын, такайыытын эмиэ күндүтүк саныыбын.

Библиотекаҕа үлэлии киирээт бу идэҕэ ылларан, оҕолору кытта биир тылы булан, хайа оҕо тугу сөбүлээн ааҕарын, көрөрүн, интэриэһиргиирин билбитим. Ол кэмнэргэ телевизизор передачаларын көрөн араас интеллектуальнай оонньуулары бэйэбит усулуобуйабытыгар сөп түбэһиннэрэн ыытарга дьулуһарбыт. Оччотооҕуга миэхэ уруоктарын чаастарын биэрэн туран хардарыта үлэлэспит учууталлары ахтыахпын баҕарабын. Ол курдук, Р.П.Туласынова, А.Д.Слепцова, Л.П.Рыжонкина, М.Р.Эверстова, уо.д.а. бааллара.

Бииргэ алтыһан, сүбэлэтэн-амалатан, эн-мин дэһэн үлэлээбит күндү коллегаларбын: Аржакова В.К., Бережнова Е.В., Ефимова А.В., Слепцова С.А., Слепцова Т.К., Сидорова А.П., Дохунаева А.А., Уваровская И.В., Слепцова Г.Е. ураты махталынан ахтабын, истиҥник саныыбын. Кинилэр киэҥ билиилэрэ, үлэлэригэр бэриниилэрэ барыбытыгар үтүө холобур буолара, олус тапсан үлэлээбиппит, доҕордоспуппут. Дойдубар библиотекаҕа үлэлээбит сылларбын олус истиҥник саныыбын, үтүө тылларынан ахтабын.

Күндү кыргыттарбын, коллегаларбын, түгэнинэн туһанан, юбилейдаах сылгытынан эҕэрдэлиибин! Барыгытыгар таһаарыылаах үлэни, ситиһиини, дьолу-соргуну, доруобуйаны баҕарабын! Айыҥ, тутуҥ, үтүө дьону уһансыҥ! Өссө да ааҕаачыларгытын угуйа, умсугута туруҥ! Элбэҕи интэриэһиргиир ааҕааччыгыт ахсаана үксүү турдун!