Бережнова Джанна Константиновна

Бережнова Джанна Константиновна – Абый улууһун Киин библиотекатыгар 30-ча сыл үлэлээбит ыстаастаах, Саха Республикатын культуратын туйгуна, кини ахтыыта:

Мин Абыйдааҕы кииннэммит библиотекаҕа 1994 сыллаахха үлэлии киирбитим, ол саҕана директор Аржакова В.К. этэ. Комплектование отделыгар опыттаах үлэһиттэр Бережнова Е.В., Ефимова А.В., ааҕар саалаҕа Полушкина Н.И., абонемеҥҥа Иванова В.К., краеведениеҕа Слепцова М.П. үлэлииллэр этэ. Кинилэр бары миигин, оҕолуу бүөбэйдээн, эдэр үлэһити сүрдээх үчүгэйдик көрсөн, сүбэ-ама биэрэн коллективтарыгар киллэрбиттэрэ. Үлэлиир коллегаларым бары библиотечнай үөрэхтээх этилэр, ол да иһин буолуо, мин эмиэ киирээт, үлэбинэн анал үөрэх ылар эбиппин диэн, үөрэнэ киирбитим. 

 Үлэбин ааҕар саалаттан саҕалаабытым. Надежда Ивановна миигин алфавитнай систематическай каталокка билсиһиннэрэн саҕалаабыта. Ол курдук, барытын ис өттүттэн көрдөрөн, по ГОСТу сааһылаан, киллэрэн, карточка оҥорторон, элбэххэ үөрэппитэ-такайбыта. Компьютер, автоматизация киирэ илик кэмэ буолан, барыта илиинэн оҥоһуллар этэ. Хас биирдии разделители, карточкалары хара пастанан бэчээт букватынан илиибитинэн суруйар этибит. Кинигэ быыстапкаларын, араас стендэлэри оҥорорбутугар трафарет түһэрэн, фломастерынан, гуаһынан туттарбыт. 

 Библиотекабытыгар завхозтаах этибит, Е.П.Слепцов. Кини бэйэтэ илиитигэр дьоҕурдаах, Намнааҕы педучилищены бүтэрбит буолан, сурукка-бичиккэ сүрдээҕин көмөлөһөр этэ. Надежда Ивановна үлэтигэр сүрдээх бэриниилээх, түргэн, практичнай, барыта уурбут-туппут сып-сап хамсаныылаах киһи этэ. Ол курдук, ааҕар саалаҕа кэрэ көстүүнү ис дууһатыттан кыһаллан оҥороро, тэрийэрэ. Итини сэргэ, сэдэх кинигэлэри, реферат суруйарга киирбит запростары, библиографическай ыйынньыктары кытта үлэлэри, араас матырыйааллары, наадалаах литератураны дьиҥ үөрэхтээх киһи быһыытынан олус кичэллээхтик, профессионально оҥороро. Ити кэмнэргэ передвижной фонд диэн сүрдээх таһаарыылаахтык, актыыбынайдык үлэлээбитэ. Бары отделларынан үллэстэн, араас тэрилтэлэринэн сылдьан, оччолорго ДИПИ, РЦ баар этэ, кинигэ, сурунаал, хаһыат ааҕыытын сүрүннээччибит.

Комплектование отделыгар Алевтина Васильевна уонна Евдокия Васильевна наһаа элбэх үлэни толороллор этэ. Сылга иккитэ кинигэ бөҕөтө кэлэр этэ. Саҥа кэлбит кинигэлэр хосторугар баппакка, коридорунан сааһыланан турааччылар. Кинилэргэ эмиэ көмө-ньыма буоларым. Быстах кэмҥэ абонемент отделыгар үлэлээбитим, кыраайы үөрэтэр саалаҕа сырдатар-оҥорор үлэлэргэ үгүстүк көмөлөспүтүм. Оҕо отделын салаатыгар Петрова О.К. кытта эмиэ үлэлээбитим. Оксана Карловна үлэтигэр бэриниилээх, элбэх идеялаах, олус үчүгэй тыллаах-өстөөх, күүстээх, грамотнай специалист этэ.

 1998-1999 сылларга автоматизация киирэн, библиотеканы компьютерынан хааччыйбыттара. Ол сылларга директорынан Слепцова Г.Е. буолбута. Кини биһигини компьютерга үөрэтэн, олох үчүгэй оскуоланы ааспыппыт. Бу сылларга библиотекаҕа эдэр үлэһиттэр киирбиттэрэ. Ол курдук, Бережнова Н.В., Соломова Е.М., Олесова А.Е., Слепцова М.А., Чиркова В.А. буолан, бэрт иллээхтик, айымньылаахтык, таһаарыылаахтык үлэлээбиппит.

2001 сыллаахха библиотекабытыгар Центр правовой информации диэн отдел арыллыбыта. Миигин, оччолорго Улан-Удэтааҕы библиотека үрдүк үөрэҕэр үөрэнэ сылдьар киһини, отдел сэбиэдиссэйинэн анаабыттара. Элбэх командировкаларга сылдьыбытым. Араас курстарга, үөрэх үрдэтиниитигэр, стажировкаларга директорым Галина Егоровна харса суох ыытааччы. Оҕо салаатын кытта бииргэ оскуолаларынан, нэһилиэктэр филиалларынан айаннаан выездной мероприятиелары ыытар этибит.   

 Сыыйа сайдыы боруогун атыллаан, ыырбыт улаханнык кэҥээбитэ. Ол курдук, саҥа мебель, компьютердар, интернет киирэн, сибээс тупсан, бары өттүнэн сайдыы барбыта. Нэһилиэнньэҕэ өйдөтүү, сырдатыы, билии-көрүү өттүгэр улахан болҕомто ууруллан, ирдэбил эмиэ кытааппыта. Библиотекабыт материальнай-техническай базата биллэ тупсубута.

 Саҥа үйэҕэ үктэнии, саҥа ирдэбил, саҥа технология кэмигэр сайдыыбыт ситимнэнэн, өссө кимиилээхтик сайдан барбыта... Бу кэмҥэ эдэр, эрчимнээх кыргыттар кэлбиттэрэ. Ол курдук, саҥалыы көрүүлээх, сонун идеялаах кыргыттар: Лия Литвинова, Алена Корякина, Лена Негтегаева, Иванна Соломова, Айталина Хоброва, Елизавета Яковлева буолан иллээх-эйэлээх коллективка үлэлээбиппит. Сонун бырайыактар, сибиэһэй сүүрээннэр киирбиттэрэ, элбэх конкурстарга кыттыбыппыт, үгүс киинэ устубуппут. Бары сүрдээх активнай позициялаах, араас улуус таһымнаах дьаһалларга кыттан, үөрэ-көтө, олус таһаарыылаахтык үлэлээбиппит.

Бу кэмнэргэ мин хаһыаттар, сурунааллар ыстатыйаларын обработкалаан, биир ситимҥэ киллэрэн, MARK программанан үлэлиир этим. 2009 сыллаахха «Корпоративная каталогизация документов формата RUSMARC» диэн дистанционнай курс ааспытым. Ол курдук, «Каталогизатор сводной базы Саха Сирэ» диэн Национальнай библиотека электроннай каталогар оройуоннааҕы «Хотугу кыым» хаһыакка тахсыбыт ыстатыйалар урукку сыллара барыта киирбитэ, ол үлэ тиһигин быспакка салҕанар. Салгыы журналист үөрэхтээх кыргыттар Кристина Слепцова, Галина Матвеева киирэннэр, үлэбит өссө сайдыбыта. Эбиитин пандемия туран, бары да, журналист курдук буолан барбыппыт.

Ити курдук, 30-ча сыл биир тэрилтэҕэ үлэлээбит сылларбын олус күндүтүк саныыбын, куруутун ахтабын-суохтуубун... Тапталлаах библиотекам өрүүтүн үүнэ-сайда, үтүөнү үксэтэ, үйэлээҕи айа-тута турдун диэн баҕа санаабын тиэрдэбин.