Сидорова Александра Прокопьевна

Майыар национальнай нэһилиэгин төрүт олохтооҕо, Саха Республикатын култууратын туйгуна, үлэ бэтэрээнэ, "Материнская слава" иккис степеннээх мэтээлин хаһаайката, сэрии сылын оҕото, 30-тан тахса сыл култуура эйгэтигэр эҥкилэ суох үлэлээбит Александра Прокопьевна Сидорова (Постникова) туһунан суруйуохпун баҕарабын.

Александра Прокопьевна Сидорова 1966 сыллаахха Дьокуускайдааҕы культурнай-сырдатар училище библиотечнай салаатын үөрэнэн бүтэрбитэ. Уонна дойдутугар олохтоох библиотекаҕа үлэтин саҕалаабыта. Кини 1995 сылга диэри библиотекарынан ситиһиилээхтик үлэлээн кэлбитэ.

Оччолорго библиотека эргэ кулуупка кыра соҕус хоско үлэлиирэ. Ол да буоллар кинигэ полкалара барыта чөкө-чөкө аккуратнайдык ууруллан библиотека киэҥ-куоҥ курдук буолара, ааҕааччылар сылдьалларыгар табыгастаах буолара. Ол сылларга хаһыакка, сурунаалга суруттарыы күргүөмнээхтик барара. Дьон ордук "Кыымнаах", "Эдэр коммунист" хаһыаттары, "Чолбон", "Роман-газета", "Огонек" сурунааллары, оҕо аймах ордук "Бэлэм буол" хаһыаты, "Пионер", "Чудеса и приключения", "Юный техник" сурунааллары сөбүлээн ааҕаллара.

Александра Прокопьевна ааҕыыҕа, кинигэни таптыырга оҕо, дьиэ кэргэн интэриэһин тардарга араас өрүттээх үлэлэри ыытара: библиотечнай уруоктары, ааҕааччылар конференцияларын, суруйааччылар биэчэрдэрин уо.д.а.

Ол курдук "Нонгдан" эбээн народнай фольклорнай ансаамбылын аан бастаан тэрийиигэ быһаччы сыһыаннаах. Оччолорго улуустааҕв Култуура Управлениетын начальнига Гаврил Гаврильевич Борисов көҕүлээһининэн күүстээх үлэ саҕаламмыт. Ол түмүгэр 42 киһилээх олохтоох эбээннэр тылларынан хор тэриллибит. Онно Никулина Евдокия Михайловна1, Лебедева Пелагея Николаевна, Никулин Михаил Гаврильевич уо.д.а. эбээннии ырыа айыллыытыгар улахан көмө буолбуттар.

Урут сэбиэскэй кэм саҕана ыраах ыстаадаҕа, отчуттарга, сылгыһыттарга, сайылыктарга наар вертолетунан, атынан баран спҥа хаһыаи, сурунаал, кинигэ илдьэн аахтараллар эбит. Ол сылларга кулууп иһинэн агиткультбригада тэриллэн ситиһиилээхтик үлэлиирэ. Агитатор олох-дьаһах, аан дойдуга туох буола турарын сырдатара.

Александра Прокопьевна сүрүн үлэтин таһынан общественнай да үлэттэн туора турбата, нэһилиэгэр депутаатынан, дьахтар Сүбэтин бэрэссэдээтэлинэн уһуннук үлэлээбит. Ону таһынан кини эдэр оҕолорго инники олохторугар сүбэ-ама биэрэн идэлэрин сөпкө талалларыгар сүбэлиирэ. Кини сүбэтинэн Кэбэргэнэттэн библиотекарь идэтин баһылаабыттара: Толстоухова (Рязанская) Евдокия Ивановна, Жиркова Анна Константиновна, Шкулева Надежда Афанасьевна.

Александра Прокопьевна биэс оҕо тапталлаах ийэтэ, элбэх сиэн, хос сиэн эбэтэ этэ. Кини Майыар нэһилиэгин култуурунай, общественнай олоҕор сэмэй кылаатын киллэрбитэ.