Олоҥхо – саха омук духуобунай баайа: библиотекаларга араас тэрээhиннэр ыытылыннылар

Олоҥхо өр кэмнэргэ норуоппут олорон кэлбит олоҕун, өркөн өйүн, ийэ тыл бараммат баайын, иҥэриниилэр быһыытынан биллэр. Бу улуу айымньы биһиги култуурабыт сүрүн баайа, кэнчээри ыччат билиитин, сайдыытын төрдө буолар. Ол иһин даҕаны, олоҥхону үйэтитиигэ, киэҥ эйгэҕэ таһаарыыга анаммыт тэрээһиннэр улахан суолталаахтар.

Олоҥхо күнүн көрсө, сэтинньи 25 күнүгэр, Саха сирин үрдүнэн олоҥхону киэҥ араҥаҕа тарҕатыыга анаммыт араас тэрээһиннэр ыытыллаллар. Олортон биирдэстэрэ Ураһалаах орто оскуолатын үөрэнээччилэригэр "Олоҥхо - саха омук уус-уран айымньытын кылаан чыпчаала" диэн ааттаах аһаҕас кэпсэтии буолла.

Бу тэрээһин оҕолору төрүт култуурабыт сүрүн баайыгар – Олоҥхоҕо – чугаһатыыга, кинилэр билиилэрин дириҥэтиигэ анаммыт этэ. Кэпсэтии сүрүн ыалдьыттарынан нэһилиэк библиотекатын уонна сынньалаҥ киинин үлэһиттэрэ буоллулар. Кинилэр оҕолорго Олоҥхо улуу аартыгын туһунан, сүрүн идеятын – үтүө-мөкү охсуһуутун, айылҕаны харыстааһын уонна ытык үгэстэри тутуһуу тематын, ону тэҥэ дьоруойдар – Ньургун Боотур, Эр Соҕотох курдук обрастарын туһунан дириҥник, интэриэһинэйдик кэпсээтилэр. Кэпсэтиигэ олоҥхо айыллыбыт кэмин, кини ис хоһоонун уонна саха норуотун олоҕор суолтатын туһунан сиһилии тохтоон аастылар.

Оҕолор кэпсэтиигэ көхтөөхтүк кыттыстылар, бэйэлэрин ыйытыыларын биэрдилэр уонна олоҥхоҕо сыһыаннаах билиилэрин көрдөрдүлэр. Тэҥҥэ кэпсэтэн, олоҥхо туһунан киэҥ билиилээхтэрин көрдөрдүлэр уонна "Олоҥхону төhө билэҕин?" тургутукка эппиэттээтилэр.

Олоҥхо дэкээдэтин чэрчитинэн Уолбут нэһилиэгэр олус суолталаах тэрээһин "Уолбут нэһилиэгин олоҥхоһута Суздалов И.А. - Сапалай" диэн бэсиэдэ буолан ааста. Бу тэрээһин нэһилиэккэ киэҥник биллибит, айыы ойууна, олоҥхоһут, алгысчыт Суздалов И.А. - Сапалай олоҕор, айар үлэтигэр анаммыта.

Тэрээhини ыыппыт библиотекарь Вероника Ивановна Сапалай олоҕун, үлэтин туһунан кэпсээтэ. Сапалай бэйэтин кэмигэр дьонугар-сэргэтигэр киэҥник биллибит, сүгүрүйүүлэрин ылбыт, дьикти талааннаах киһи этэ. Кини уус тыллаах олоҥхоһут эрэ буолбакка, айыы ойууна уонна алгысчыт быһыытынан эмиэ ытыктабылы ылбыта. Библиотекарь Сапалай олорон ааспыт олоҕун, айымньыларын, олоҥхолорун тилиннэрэн, кинилэр суолталарын дьоҥҥо тириэртэ. Уустартан уус, номоххо киирбит киһи буоларын иһитиннэрдэ.

Бэсиэдэ кэмигэр Вероника Ивановна Д.А.Томская - Чайка олоҥхотуттан быһа тардан аахта. Олоҥхо ураты кэрэтин, тылын уустугун, ис хоһоонун дириҥин ырытан, истээччилэргэ сырдатта.

Бу бэсиэдэ Сапалай курдук улуу киhини үйэтитэргэ, кини култуураҕа киллэрбит кылаатын ыччакка тириэрдэргэ улахан суолталаах буолла.

Аартыктаах олоҥхо эйгэтинэн дириҥник үлүһүйэр, билиитин кэҥэтэр дьон ортотугар тэриллибит "Олоҥхо алыптаах дойдута" диэн өй-санаа күрэҕэ Уолбут нэhилиэгэр библиотекарь Вероника Ивановна иилээн-саҕалаан ыытта. Бу күрэххэ кыттааччылар олоҥхоҕо сыһыаннаах араас ыйытыыларга хоруйдаан, бэйэлэрин билии кээмэйдэрин көрдөрдүлэр. Барыта 12 боппуруостан турар сорудахха эппиэттээн, биктэриинэ кыайыылааҕа Жиркова Аксинья Ильинична уһулуччу ситиһиини ситистэ. Кини 12 ыйытыыттан 9-гар сөптөөх хоруйу биэрэн, дьоһуннаах кыайыыны оҥордо. 

Маннык күрэхтэр норуоту олоҥхоҕо интэриэстэрин көбүтэллэр, кинилэри төрөөбүт тылга, төрүт култуураҕа чугаһаталлар.

Олоҥхо Дэкээдэтин чэрчитинэн маннык тэрээһиннэр олоҥхону өйүүргэ, саха норуотун тыыннаах баайынан оҥорорго көмөлөһөллөр. Саха олоҥхото үйэттэн үйэҕэ салгыы кэпсэниллибитинэн сырыттын, кини дьикти дорҕооно хаһан да намтаабатын!