Күннүү сырдаабыт олох, үйэлээх үгэс: Жиркова Евдокия Васильевна 100 сааһыгар анаммыт ахтыы киэһэтэ

Саха норуотун үйэлэртэн кэлбит духуобунай баайын, төрүт үгэстэрин чөлүнэн илдьэ сылдьар, кэлэр көлүөнэҕэ кэрэ холобур буолар дьоммут ааттара үрүҥ күн анныгар үйэтийдин. Ааспыт хомус күнүгэр сөп түбэһиннэрэн, бэрт үтүөкэн киэһэ буолан ааста. Улуу өбүгэбититтэн бэриллибит ытык кэриэһи, арчыны, алгыһы тута сылдьыбыт, хомус ууһун курдук тыыннаах дорҕоонноох, дэгэрэҥ ырыаны эҥээрдэспит, сүүс сааһын туолбут, барытыгар сатабыллаах Далбар Хотуна, Евдокия Васильевна Жирковаҕа анаммыт ахтыы киэһэтэ мустубут дьоҥҥо умнуллубат түгэннэри бэлэхтээтэ.

Бу дьоро киэһэни иилээн-саҕалаан библиотекарь Вероника Ивановна ыытта. Кини сахалыы сиэринэн ытыктабыллаах Евдокия Васильевна олоҕун, үлэтин-хамнаһын, кини саха омугун култууратын сайдыытыгар киллэрбит сүҥкэн кылаатын туһунан кэпсээн, мустубут дьон болҕомтотун уһугуннарда.

Евдокия Васильевна Жиркова аҕыйах ахсааннаах саха норуотун ураты суолун, былыргы үгэстэрин, итэҕэлин кэнчээри ыччакка тиэрдиигэ олоҕун анаабыт дьонтон биирдэстэрэ.