Сэтинньи 25 күнүгэр Олоҥхо дьыктаана ситиһиилээхтик ааста

Сэтинньи 25 күнүгэр өрөспүүбүлүкэ араас муннуктарыгар Саха Өрөспүүбүлүкэтин Духуобунай сайдыытын уонна үөрэҕириитин күннэрин чэрчитинэн Аан дойдуга биллибит Олоҥхо дьыктаана ыытылынна. Бу тэрээһин саха норуотун тылын, култууратын уонна ЮНЕСКО киһи аймах үйэлээх баайынан билиммит сүдү уоһунан уус-уран айымньытын, Олоҥхону дьоҥҥо-сэргэҕэ киэҥник тарҕатар, чиҥэтэр сыаллаах ыытыллар.

Абый улууhугар былырыыҥҥы курдук, быйыл даҕаны дьыктаан тэрээһиҥҥэ интэриэстээх дьон көхтөөхтүк кытынна. Ол курдук Иннокентий Иванович Бурнашев - Тон Суорун «Сылгы уола Дыырай» диэн олоҥхоттон быhа тардыытыттан сахалыы уонна нууччалыы сурууйдулар. Барыта 85 киһи дьыктааны суруйан, бэйэтин төрөөбүт тылыгар дьоҕурун уонна Олоҥхоҕо билиитин тургутан көрдө. Кыттааччылар араас саастаахтар, араас идэлээхтэр этилэр, эдэр ыччаттан саҕалаан кырдьаҕастарга тиийэ, бары биир сомоҕо буолан төрөөбүт тылларыгар бэриниилэрин көрдөрдүлэр.

Бу курдук тэрээһиннэр саха тылын, суругунан култууратын уонна норуот уус-уран айымньытын, ол эбэтэр Олоҥхону үйэтитэргэ улахан суолталаахтар. Олоҥхо дьыктаана – төрөөбүт тылынан суруйуу култууратын үрдэтэр, кини Олоҥхону өйдүүрүн, суруйарын тупсарар күүстээх дьайыы. Кэлэр сылларга өссө элбэх киһи кыттыыны ылыа диэн эрэнэбит.