«Хотугу кэпсээннэр» кинигэ презентацията

Бу күннэргэ Абыйдар биир дойдулаахпыт, Саха Республикатын культуратын үтүөлээх үлэһитэ, суруйааччы, поэт,  Россия уонна Саха Республикатын журналистарын союһун чилиэнэ, Абый улууһун Бочуоттаах олохтооҕо,  Николай Васильевич Слепцов – Абыйчанин 100 сааһыгар анаан тахсыбыт «Хотугу кэпсээннэр» кинигэ сүрэхтэниитэ буолан ааста.

«Хотугу кэпсээннэр» кинигэҕэ Абыйчанин араас сылларга суруйбут кэпсээннэрэ киирдилэр. Айымньылар хоту дойду олоҕун-дьаһаҕын, дьонун-сэргэтин, айылҕатын хоһуйаллар. Кэпсээннэр олох дириҥ төрүттэрин, киһи дууһатын кэрэтин арыйаллар.

Кинигэҕэ үгүс кэпсээн-үһүйээн  дьиҥнээх олохтон суруллубуттар. Ол курдук, олох иһин охсуһуу, хотугу таптал, эбээн норуотун дьылҕата уустаан-ураннаан, истиҥ иэйиилээхтик суруллубуттар. Итини сэргэ ийэҕэ итии таптал, дьахтарга улуу убаастабыл, уол кыыска истиҥ сыһыанын эдэр ыччаты, үүнэр көлүөнэни иитиигэ сыаллаахтар-соруктаахтар.

Суруйааччы тыыннаҕар  уһуллубут архивнай видео көрдөрүллэн, тэрээһин суолтатын үрдэттэ. Библиотека үлэһиттэрэ Абыйчанин хоһооннорун доргуччу аахтылар, «Кыраһа» народнай ырыа ансаамбыла, Сутуруохаттан «Сарыал» кыргыттар, уолаттар бөлөхтөрө ыллаан-туойан тэрээһини киэргэттилэр.

Суруйааччы 100 сааһыгар анаммыт «Абыйчанин ыллыгынан» диэн  оскуола оҕолоругар улуустааҕы күрэх биллэриллибитэ. Күрэх сүрүн ирдэбилинэн, Абыйчанин айымньыларыгар олоҕуран,  кыттааччы сөбүлээбит геройун, кини олоҕун, эбэтэр айымньытын бэйэтин көрүүтүнэн салгыы хоһуйуу, билгэлээһин, бэйэ айымньытын айан таһаарыы буолар... Бу күрэх кыайыылаахтарыгар уонна кыттыылаахтарыгар туоһу суруктар, өйдөбүнньүк бэлэхтэр туттарылыннылар.