Лирик-поэт Григорий Дохунаев 90 сылыгар анаан литературнай-музыкальнай биэчэр

Бүгүн, олунньу 5 күнүгэр, улуустааҕы кииннэммит библиотекаҕа биир дойдулаахпыт, лирик-поэт Григорий Дохунаев 90 сылыгар анаммыт литературнай-музыкальнай биэчэр буолан ааста. 

Истиҥ көрсүһүүгэ поэт олоҕо, айар үлэтэ сырдатылынна, хаартысканан слайд көрдөрүлүннэ, ыллам ырыа ылланна, библиотека үлэһиттэрэ автор хоһооннорун дорҕоонноохтук ааҕан иһитиннэрдилэр.

Григорий Дохунаев устудьуоннуур кэмиттэн хоһоонноро, үгэлэрэ "Хотугу сулус" сурунаалга, "Кыым", "Эдэр коммунист", "Бэлэм буол" хаһыаттарга бэчээттэммиттэрэ сырдатылынна. Кини литератураҕа хоннохтоохтук киирэн испитин оччотооҕу устудьуон доҕотторо, кэлин биллэр суруйааччы, прозаик, поэт буолбут дьоммут: Петр Аввакумов, Василий Сивцев, Николай Босиков, Иван Сысолятин, Николай Рыкунов, Петр Дмитриев-Туутук, Иван Кузьмин, Егор Жирков, Николай Габышев-Нэртэни курдук биллэр-көстөр дьон ахтыыларын истэн биир дойдулаахтара олус үөрдүлэр уонна долгуйдулар.

Лиирик поэт хоһоонноругар мелодистар Аркадий Алексеев, Владимир Индигирскай суруйбут уостан түспэккэ ылланар ырыаларын СР культуратын туйгуна Аграфена Глушак, “Кыраһа” бөлөх, биир дойдулаахтара Николай Аммосов, Юрий Новиков бэлэхтээтилэр. Биир долгутуулаах түгэнинэн, поэт хос сиэнэ кыыс Эльмира Сокурова ыллам ырыатын бэлэхтээбитэ буолар. Ити курдук, утум салҕанар, ситим быстыбат...

Лирик-поэт хоһоонноругар саныыр санаата, дьулуһар дьулуура, төрөөбүт дойдутугар истиҥ сыһыана, эдэр саас, таптал сырдык иэйиитэ – чугас, билэр дьонун, кини талааныгар сүгүрэйээччилэр өйдөрүгэр-санааларыгар күн бүгүнүгэр диэри дириҥник иҥэн, сөҥөн хаалбыттар. Олус сэмэй, уйан дууһалаах, симик гынан баран, киһи санаатын сайа охсор тыллардаах хоһоонньут Григорий Дохунаев ситэ олорботох олоҕун ыччаттара, биир дойдулаахтара салҕыыллар. Кини уһуннук олорбута буоллар, талаана өссө да үүнүө-сайдыа хааллаҕа. Кылгас олоҕор суруйан хаалларбыт айымньылара аатын ааттана сырыттахтара...