Оҕо төрөөбүт тылынан ааҕыытын тарҕатар Киин арылынна

Быйыл дойду үрдүнэн Норуоттар сомоҕолоһууларын, Сахабыт Сиригэр Култуура сылыгар тыл эйгэтэ сайдарыгар, дьон-сэргэ ийэ тылыгар таптала өссө күүһүрэригэр бииргэ үлэлэһэр сорук турар. Элбэх омук бииргэ олорор, айар-тутар оройуона буоламмыт, күннэтэ нуучча тылын туттабыт. Төһө да улуу нуучча тыла сабыдыаллаатар, төрөөбүт төрүт тылбытын үөрэтиэх, сайыннарыах тустаахпыт. Маннык сыаллаах-соруктаах улуустааҕы Кииннэммит библиотекаҕа оҕо төрөөбүт тылынан ааҕыытын тарҕатар Киин үөрүүлээх быһыыга-майгыга арылынна. 

Тэрээһиҥҥэ Н.Н.Ефимов аатынан гимназия, В.П.Ефимов аатын сүгэр орто оскуола, Сутуруоха орто оскуолатын үөрэнээччилэрэ, Оҕо искусствотын оскуолатын иитиллээччилэрэ уонна учууталлара кыттыыны ыллылар.

Төрөөбүт тылга биһиги култуурабыт, мындырбыт, үгэспит уонна сүрэхпит сылааһа иҥэ сылдьарын тоһоҕолоон туран, библиотека үлэһиттэрэ туох сыаллаах-соруктаах тэриллибит Киин буоларын сырдаттылар, итиэннэ Ийэ тыл – норуот дууһата, өбүгэлэри кытта ситимэ уонна инники далаһата буоларын өйдөттүлэр. 

Сахалыы симэнэн кэлбит оҕолор ыллаан-туойан, хоһоон ааҕан, саха араас музыкальнай инструменнарыгар оонньоон көрдөрдүлэр-иһитиннэрдилэр. Тэрээһин уопсай оһуохайынан түмүктэннэ. Ол курдук, Сутуруоха орто оскуолатын алын кылааһын үөрэнээччитэ Айтал Слепцов уонна Үрүҥ Хайа гимназиятын үөрэнээччитэ Радмир Прокопьев оһуохайдаан доллоһутан, тэрээһини өссө сэргэхситтилэр. Оҕолор сахалыы араас остуол оонньууларын ордук сэргээтилэр, итиэннэ дьэрэкээн уруһуйдаах кинигэлэри көрөн, ааҕан, Кииҥҥэ көтүппэккэ сылдьыах буолан, сүргэлэрэ көтөҕүллэн тарҕастылар.

Саҥа тэриллибит Кииммит кэнчээри ыччаппытыгар элбэх саҥаны, сонуну биэрдин, оҕо болҕомтотун тардан, араас ньымалары тутуһан үүннүн-сайыннын, саҥа таһымҥа таҕыстын! Төрөөбүт Ийэ тылгытынан саҥарыҥ, кэпсэтиҥ, элбэх кинигэтэ ааҕыҥ диэн баҕа санааны оҕолорго тиэртибит.

Көхтөөх кыттыыны ылбыт оҕолорго, уһуйааччыларга библиотека үлэһиттэрэ барҕа махталларын биллэрдилэр. Ийэ тылбыт үйэттэн үйэҕэ симэлийбэккэ, саха норуота өйө-санаата сайдарыгар күүс-көмө, тирэх буола, барҕара турдун! Сахалыы уран-уус тылбыт хас биирдии дьиэ кэргэҥҥэ, оҕо, үөрэх кыһаларыгар эйээрдин! Өбүгэбит тылыгар оҕолорбутун үөрэтиэххэ, сайыннарыахха, тылбытын – барҕа баайбытын харыстыахха!