Көбүөр тигиитигэр маастар-кылаас ыытылынна

Аан дойду Дьахталларын, Саха Өрөспүүбүлүкэтигэр Норуот маастарын күннэрин көрсө, улуустааҕы кииннэммит библиотекаҕа олохтоох иистэнньэҥнэр К.М.Черемкина уонна И.Н.Атласова баҕалаах хаһаайкаларга тыстан көбүөр тигиитигэр маастар-кылаас ыыттылар. Итиэннэ бэйэлэрэ тикпит тыстан, түүттэн тикпит көбүөрдэрин быыстапкалаатылар. Тыс тобоҕуттан көбүөр тигиитигэр ханнык иннэ, сап барсарыттан саҕалаан, тыс сааһын, хойуутун, өҥүн-дьүһүнүн, туох-баар ымпыгар-чымпыгар тиийэ, сиһилии кэпсээтилэр, көрдөрдүлэр. 

Бу күн иистэнньэҥ, барытыгар талааннаах, илиитигэр дьоҕурдаах Далбар Хотун Изольда Атласова тикпит көрүөхтэн кэрэ көбүөрэ сүрэхтэннэ. Изольда Николаевна олус кичэйэн, дууһатын ууран тикпит көбүөрүн көрөн, бары сөхтүлэр-махтаннылар. 

Маастар-кылааска сылдьыбыт дьон тыстан тигии ньымаларын, кистэлэҥнэрин, билбэттэрин билэн, үөрэн-көтөн, махтанан тарҕастылар.