Ураhалаах библиотекатын "Кудесница" кулууба бэтэрээннэр тэрээhиннэригэр кыттыыны ыллылар

Абый улууһун нэһилиэктэрин икки ардыгар доҕордуу сибээһи бөҕөргөтөр, бэтэрээннэр олоххо көхтөөх позицияларын өйүүр сыаллаах үтүө үгэс салҕанар. Ураһалаах нэһилиэгин Култуура киинигэр Абый уонна Ураһалаах нэһилиэктэрин бэтэрээннэрин доҕордоһуу көрсүһүүтэ олус үрдүк таһымнаахтык буолан ааста.

Бу күн Култуура киинин иһэ бырааһынньыктыы киэргэтиллэн, ыалдьыттары эйэҕэстик көрүстэ. Тэрээһин бастакы чааһыгар "Кудесница" кулууп маастардара бэйэлэрин сатабылларын көрдөрдүлэр. "Кудесница" кулуубу филиал 5 библиотекаря Екатерина Егоровна салайан ыытар. Кинилэр илии оҥоһуктарын, сахалыы иис-уус араас көрүҥнэрин билиһиннэрэр анал быыстапка туруордулар. Быыстапкаҕа кэрэ аҥардар оҥорбут иистэрэ дьон болҕомтотун тарта. 

Тэрээһин иккис чааһа эҕэрдэ нүөмэрдэринэн арылынна. Олохтоох айар коллективтар уонна бэтэрээннэр бэйэлэрэ дууһаны кылыһахсытар ырыаларынан, хоһооннорунан көрсүһүүнү киэргэттилэр. Көхтөөх оонньуулар, көрүдьүөс күрэхтэр кырдьаҕастарбыт эдэр саастарын санатан, кинилэргэ умнуллубат түгэннэри бэлэхтээтилэр.

Салгыы эйэҕэс кэпсэтиилээх, сылаас чэйдээх, астаах-үөллээх сандалы тула олорон уопут атастаһыыта буолла. Бэтэрээннэр нэһилиэктэр икки ардыларыгар доҕордоһуу суолтатын бэлиэтээтилэр, инникитин маннык көрсүһүүлэр өссө да элбэх буола туруохтарын баҕардылар.

Маннык тэрээһиннэр бэтэрээннэрбит соҕотохсуйбаттарыгар, нэһилиэк олоҕор көхтөөхтүк кытталларыгар уонна бэйэ-бэйэлэрин кытта истиҥник алтыһалларыгар улахан суолталаахтар. Көрсүһүү түмүгэр бары үөрэ-көтө, өй-санаа көтөҕүллүүлээх тарҕастылар.