Суруйааччыбыт сырдык аатыгар сүгүрүйэн

Ыам ыйын 13 күнүгэр, биир дойдулаахпыт, киэн туттар киһибит, суруйааччы, суруналыыс, Саха Республикатын суруйааччыларын Сойууһун чилиэнэ, Саха Республикатын култууратын үтүөлээх үлэһитэ, Абый оройуонун Бочуоттаах олохтооҕо Николай Васильевич Слепцов — Абыйчанин төрөөбүт күнүгэр, Майыардааҕы култуура үлэһиттэрэ уонна библиотекарь кини аатын сүгэр беседканы сэргэхситтилэр, хомуйдулар.

Бу күн кинилэр суруйааччыбыт айымньылаах олоҕун, айар үлэтин ахтан-санаан аастылар. Беседка иһин-таһын ыраастаан, саҥардан, кини сырдык аатыгар сүгүрүйүү бэлиэтинэн буолла. Суруйааччы остуолугар сибэкки дьөрбөтүн ууран, кинини кэриэстээтилэр, айымньыларыгар сүгүрүйэллэрин биллэрдилэр.

Николай Абыйчанин айымньылара ааҕааччыга иитэр-үөрэтэр, сырдыкка-кэрэҕэ угуйар күүстээхтэр. Култуура үлэһиттэрин бу үтүө дьыалалара — суруйааччыбыт аатын үйэтитиигэ, эдэр көлүөнэҕэ тиэрдиигэ дьоһун хардыы.

Маннык тэрээһиннэр биһигини барыбытын түмэллэр, төрөөбүт дойдубутугар тапталы, ытыктабылы иҥэрэллэр. Николай Абыйчанин аата үйэлэртэн үйэлэргэ ааттана, ахтылла туруо диэн эрэнэбит.